Waziri wa Ujenzi na Uchukuzi, Profesa Makame Mbarawa, ametoa wito kwa wananchi na wadau mbalimbali, kuchukua tahadhari na kufuatilia taarifa za hali ya hewa, zinazotolewa na Mamlaka za Hali ya Hewa, pamoja na kutekeleza maelekezo yanayotolewa.
Waziri Mbarawa amebainisha hayo leo wakati akizungumza na waandishi wa habari katika kuadhimisha siku ya hali ya hewa Duniani, kama sehemu ya kumbukumbu ya kuanzishwa kwa Shirika la Hali ya Hewa Duniani tangu Machi 23, 1950.
Amesema, Nchi zenye kipato cha chini na kati zinakabiliwa na changamoto kadhaa katika upande wa sekta ya hali ya hewa kutokana na uwezo mdogo wa matumizi sahihi ya taarifa kwa wananchi.
Kwa upande wake, Mkurugenzi Mkuu wa Mamlaka ya Hali ya Hewa Tanzania (TMA), Dkt. Agnes Kijazi amesema ongezeko la majanga yanayotokana na hali ya hewa linaenda sambamba na ukubwa wa athari zake hivyo wataendelea kutoa tahadhari mapema ili kupunguza maafa yanayoweza kutokea.
Amesema, TMA imejipanga kuhakiksha kufuatilia mifumo ya hali ya hewa pamoja na kuwa na njia nzuri ya kuhakikisha taarifa sahihi zinawafikia wananchi mapema na hatua stahiki ziweze kuchukuliwa.
