Mkuu wa Wilaya ya Geita Apongeza BoT kwa Elimu ya Fedha Maonyesho ya Biashara
Mkuu wa Wilaya ya Geita, Hashim Komba, ameipongeza Benki Kuu ya Tanzania (BoT) kwa jitihada zake za kuendelea kutoa elimu kwa wananchi kuhusu masuala ya kifedha kupitia maonyesho ya madini yanayoendelea mkoani humo. Amesema elimu hiyo imekuwa chachu kubwa ya kuelimisha wananchi juu ya namna bora ya kutumia taasisi za kifedha zilizosajiliwa, hasa katika kipindi ambacho changamoto ya mikopo isiyo rasmi imekuwa ikiwakumba wananchi wengi.
Katika ziara yake kwenye mabanda ya maonyesho hayo, Komba alitembelea kitengo cha usimamizi wa masuala ya fedha, usimamizi wa benki na mikopo. Amebainisha kuwa, kwa muda mrefu wananchi wa maeneo mbalimbali wamekuwa wakikumbwa na changamoto ya taasisi zisizosajiliwa ambazo hutoa mikopo kwa riba kubwa na hatimaye kuwaumiza wateja wao.
“BoT ina kitengo maalum kinachohakikisha taasisi zinazotoa mikopo kwa wananchi zimesajiliwa na zinafuata sera za kifedha za Taifa. Hii ni hatua muhimu ya kulinda wananchi dhidi ya taasisi zinazokopesha bila kufuata sheria na kuwafilisi wananchi wetu,” alisema Komba.
Aidha, Mkuu huyo wa Wilaya alieleza kufurahishwa kwake na hatua ambazo serikali imekuwa ikichukua mara baada ya kupokea taarifa za taasisi zinazowakopesha wananchi bila usajili. Alisema baadhi ya wananchi, akiwemo wajane, wamepoteza mali zao ikiwemo nyumba baada ya kushindwa kurejesha mikopo ya riba kubwa, lakini uchunguzi umebaini taasisi hizo hazikuwa zimesajiliwa.
Kwa mujibu wake, wananchi wanapaswa kuacha kukimbilia mikopo rahisi kutoka kwa taasisi zisizotambulika, bali wajenge utamaduni wa kutumia taasisi zinazotambuliwa na BoT. Amesema njia hiyo itarahisisha mamlaka kuchukua hatua pale changamoto zinapotokea, na hivyo kuwalinda watumiaji wa huduma hizo.
Katika ziara hiyo, Komba pia alishuhudia ushirikiano wa karibu kati ya BoT na Bodi ya Bima ya Amana (DIB), ambao unalenga kulinda mali na amana za wananchi walioweka fedha zao katika taasisi za kifedha zilizosajiliwa. “Hii ni faida kubwa kwa wananchi kwani hata taasisi ikipata changamoto, bado kuna chombo cha kisheria kinachowalinda,” alisisitiza.
Ametoa onyo kali kwa taasisi na watu binafsi wanaotoa mikopo kinyume na sheria, akitaja mji mdogo wa Katoro mkoani Geita kuwa miongoni mwa maeneo yenye changamoto kubwa. “Serikali haitasita kuchukua hatua kali dhidi ya taasisi zinazokiuka sheria, na kwa kushirikiana na BoT, tutahakikisha wananchi wanalindwa ipasavyo,” alisema.
Vilevile, Komba aliwataka wananchi kuchukua tahadhari dhidi ya wimbi la ulaghai wa kifedha unaoibuka kupitia teknolojia, hususan kwa njia ya ujumbe mfupi wa simu. Ameonya wananchi kuepuka tamaa ya kupata fedha kwa haraka kutoka taasisi zisizojulikana, badala yake waende kwenye taasisi zilizosajiliwa ambazo serikali inaweza kuzisimamia ipasavyo.
Katika kuhitimisha, Mkuu wa Wilaya alitoa shukrani kwa Rais Dkt. Samia Suluhu Hassan kwa kuweka mazingira rafiki ya uwekezaji, hasa katika sekta binafsi na madini. Amesema hali hiyo imekuwa kichocheo cha mafanikio ya maonyesho ya mwaka huu ambayo yamevutia zaidi ya washiriki 600, ikilinganishwa na washiriki 300 wa mwaka uliopita, jambo ambalo ni ishara ya ukuaji na mafanikio makubwa ya sekta binafsi nchini.
