Mkazi wa Jiji la Dodoma, Grayson Matuma, amesema elimu aliyoipata katika Banda la Shirika la Nyumba la Taifa (NHC) kwenye Maonesho ya Nanenane imeondoa dhana aliyokuwa nayo kwa muda mrefu kwamba mchakato wa kupata nyumba za shirika hilo ni mgumu na wenye vikwazo vingi.
Matuma alieleza kuwa kabla ya kutembelea banda hilo alikuwa na mtazamo usio sahihi kuhusu huduma za NHC, lakini baada ya kuzungumza na wataalamu wa shirika hilo ameelewa hatua zote zinazohitajika ili kumiliki au kupata nyumba za NHC.
Alisema maelezo aliyopatiwa yalikuwa ya wazi na yenye kueleweka, jambo lililomjengea imani zaidi kuhusu huduma zinazotolewa na shirika hilo. Alibainisha kuwa maswali yote aliyokuwa nayo yalijibiwa kwa ufasaha na kumfanya aondoke akiwa na uelewa mpana.
Aidha, Matuma aliipongeza NHC kwa kuendelea kujenga nyumba zenye viwango bora na kwa kutoa elimu kwa wananchi kuhusu huduma zake, akisema hatua hiyo inasaidia kuondoa dhana potofu zinazoweza kuwazuia watu kutumia fursa zilizopo.
Aliahidi kuwa sehemu ya watu watakaosambaza taarifa sahihi kwa jamii kuhusu huduma za NHC, akiwahamasisha wananchi kutafuta taarifa kutoka vyanzo rasmi badala ya kuamini taarifa zisizo na uhakika.
Kwa mujibu wa NHC, Maonesho ya Nanenane yamekuwa jukwaa muhimu la kukutana na wananchi, kusikiliza maoni yao na kutoa ufafanuzi kuhusu masuala ya ununuzi wa nyumba, upangishaji pamoja na fursa mbalimbali za uwekezaji zinazotolewa na shirika hilo.
Shirika hilo limeeleza kuwa wananchi wengi wanaotembelea banda lake wamekuwa wakiondoka na uelewa mpya baada ya kupata maelezo ya kina kutoka kwa wataalamu wake, hali inayochangia kuongeza mwamko kuhusu huduma zinazopatikana.
NHC imeendelea kuwakaribisha wananchi kutembelea banda lake katika Maonesho ya Nanenane ili kupata taarifa sahihi kuhusu huduma za makazi, umiliki wa nyumba na fursa nyingine zinazotolewa na shirika hilo kwa maendeleo ya wananchi na taifa kwa ujumla.
